SpeedDating「閒聊力」之必要
- CaCa
- 7月18日
- 讀畢需時 3 分鐘
已更新：7月24日
你識唔識開口？喺 Speed Dating 裏面，閒聊先係打開緣份嘅第一步！
喺一場 Speed Dating 活動入面，兩個人坐低，一對一咁輪住傾。氣氛明明係浪漫嘅，但偏偏有啲人，一開口就好似面試，氣氛即刻急凍：「你做邊行㗎？」「哦，我做....。」又或者……「你有咩嗜好？」「我鍾意....。」然後，就冇然後。有啲人，一開口就好似審問「你公司地址係邊？」「你搵幾錢一個月？」「有冇樓？有冇車？」 然後，一定冇然後。
有啲人明明條件唔錯，樣子斯文，講嘢有禮，但總係唔夠輕鬆——你見到佢眼神游移，腦入面似乎仲係度諗：「我應該講乜？講多會唔會好奇怪？」結果，對面個人都開始尷尬，對話卡 咗，緣份亦就咁錯過咗。
但係同一場活動裏，總有一兩個人，一坐低就令人感覺舒服。佢哋未必講啲好勁嘅話題，但總係識得開場：「你覺得今次個場幾唔錯吖，有冇人啱眼緣？」、「你頭先講你鍾意行山，有冇推介路線呀？」——啱啱好嘅輕鬆、啱啱好嘅共鳴，令人想講落去。
其實，所謂吸引力，未必係你講幾多，而係你識唔識用一啲貼地、自然嘅方式，打開兩個人之間嘅對話空間。這就係「閒聊力」即係Small Talk——一種唔需要高深技巧，但會令你喺短時間內被記住嘅社交魅力。
Small Talk唔係廢話，而係打開關係嘅鑰匙
閒聊唔係講廢話，更唔係扮熟識，而係透過一些輕鬆又無壓力的話題，去製造「我哋可以慢慢傾」的氛圍。
就好似見工HR唔會一坐低就問你「點解要請你？」，都會同你講兩句閒話：「今日天氣幾好喎」、「地址難搵嗎？」呢啲說話雖然冇內容，但對緩和氣氛、建立信任好重要。戀愛都一樣，無論係Speed Dating定朋友介紹對象，第一步從來唔係「條件表演」，而係先讓人感覺你係一個「願意交流」的人。
具閒聊力的人，總比人多一點機會
心理學上除「黃金七秒外在吸引力」，仲有個「黃金三分鐘溝通印象」理論，指人初次見面時會喺極短時間內形成第一印象。而懂得Small Talk的人，喺這三分鐘內，就已經可以用一句簡單說話，拉近兩人距離。
Speed Dating當中，外表、職業、興趣等等都係參考因素，但真正令人留下印象嘅，往往係氣氛感——即係對方同你傾偈時，你係咪感覺舒服、自然？係咪會想繼續聽落去？
講得太多、太快反而唔自然；太靜、太緊張，又會令對話無從發展。最有魅力的，係懂得觀察、懂得聽、懂得問嘅人。
Small Talk = 開場白＋同理心＋真誠好奇
Small Talk 唔係要你講笑話、搞幽默，而係三個重點：
一，開場白：唔需要新奇刺激，只要貼地。從「你住邊區？」「你今日嚟之前做咗啲咩？」「最近有冇睇過好睇嘅戲或劇？」等簡單問題入手已經夠。
二，同理心：根據對方答法，順勢追問，唔逼人答，也唔講自己為主。
三，真誠好奇：對人有興趣，問問題時自然流露出想了解對方的態度，對方一定感覺到。
有位好朋友就試過一次Speed Dating中，只係憑一個「你頭先講跑步，好似講到好開心喎，你跑開邊度㗎？」就同對方傾咗成晚，後來更發展成穩定關係。
緣份從來都係由Small Talk 開始
拍拖唔係比賽，不需要你話術滿分先會被選中。但懂得閒聊，代表你尊重對方、重視交流、準備好展開關係。其實，戀愛就係由一場場普通對話開始，慢慢了解、慢慢發展。
下次再參加交友活動，不妨放鬆啲，唔使準備完整自我介紹。你只需要準備好一個輕鬆的自己。
留言